काठमाण्डौ । शुक्रबार राष्ट्रिय आर्थिक सरोकार समाज, नेपाल मध्येक्षेत्रीय समिति र आर्थिक विकास तथा प्रशासन अनुसन्धान केन्द्र (सेडा) को संयुक्त आयोजनामा पूर्व बजेट छलफल तथा सुझाव संकलन कार्यक्रम सम्पन्न गरियो । उक्त कार्यक्रमको उद्घाटन उपप्रधान तथा अर्थमन्त्री विष्णु प्रसाद पौडेलले गरेका थिए ।
अर्थमन्त्री पौडेलले गणतन्त्रको स्थापना भएको केही समय पश्चात अर्थतन्त्रका समग्र सूचकहरुमा सुधार हुँदै गएको तथ्यांकमा देखिएता पनि विश्व परिदृष्यलाई मध्येनगर गर्नु पर्ने अवस्था रहेको बताएका छन् । आफ्नै स्रोत व्यवस्थापन, पूँजीगत दायित्व, व्यवस्थापनको जिम्मेवारी र हाम्रा असिमित आकांक्षाहरुलाई सम्बोधन गर्दै हामीले आर्थिक क्षेत्रको सुधार मार्फत आमनागरिकलाई सुखि जीवनको प्रत्याभुत गर्छौ भनेका छौ । विगतका बजेटका नीति तथा कार्यक्रममलाई हेर्दा हामीले गर्छौ भनेर भन्न बाँकी केही छ जस्तो लाग्दैन । अवका दिनमा गर्नु पर्ने कामलाई प्राथामिकिकरण गरी हाम्रो सामथ्यसँग जोड्न अर्थमन्त्रालय लागि परेको साथै स्रोत व्यवस्थापन र विनियोजित खर्चको सन्दर्भमा आर्थिक अनुशासन अवलम्बन गर्न आवश्यक रहेको उनले बताए ।
समग्र अर्थतन्त्रको अवस्थाले पूँजीगत खर्चको वृद्धि गर्नु पर्ने राष्ट्रिय आवश्यकता छ । संविधानमै तीन तहका सरकार र तीनका अधिकारका सूचीको परिधिभित्र रहेर बजेट निर्माण गर्नु पर्दा हामी कहिन कही चुकेका छौ । यि तीनै सरकारका अधिकारलाई सम्बोधन गर्न सक्छौ त भन्ने चुनौती पनि हामी सामु रहेको छ । यदि सक्छौ भन्ने विषयमा दृढ पकडका साथ अगाडि बढ्दा विज्ञहरुको साथ आवश्यक हुने उनले बताए । आगामी वर्षको बजेट निर्माण गर्ने सन्दर्भमा के गर्ने? कसरी गर्ने ? र कस्तो नतिजा प्राप्त गर्ने ? त्यसमा केन्द्रित भएर आएका गहकिला सुझावहरुलाई बजेटमा लिपिवद्ध गरिने प्रतिवद्धता मन्त्री पौडेल जनाए ।
अर्थमन्त्रीको आतिथ्यतामा आयोजित कार्यक्रममा अर्थमन्त्रालयका सचिव, सेडाका प्रमुख, वरिष्ट अर्थशास्त्री, अर्थविज्ञ, निजी क्षेत्रका प्रतिनिधि, अनुसन्धान क्षेत्रका विज्ञ, क्याम्पस प्रमुख, अर्थशास्त्र विभागका प्रमुख, अध्यापनरत प्राध्यापक, स्नातकोत्तर तहमा अध्ययनरत विद्यार्थी, सामाजिक अभियन्ता तथा अर्थतन्त्रसँग सरोकार राख्ने महानुभावहरुको उपस्थिति रहेको थियो ।
उक्त कार्यक्रमा राष्ट्रिय आर्थिक सरोकार समाज, नेपालले प्रकाशन गर्दै आएको आर्थिक सरोकार पत्रिकाको अनलाईन पत्रिका अर्थशास्त्री डटकम न्यूज पोर्टल अर्थमन्त्री पौडेल मार्फत समुद्घाटन गरियो । समुद्घाटन लगत्तै उक्त पत्रिकाका सम्पादक केशव आचार्यले अर्थशास्त्री डटकम न्यूज पोर्टलको औचित्य र आवश्यकताबारे प्रकाश पारेका थिए ।
कार्यक्रममा आगामी बजेटका सन्दर्भमा राष्ट्रिय योजना आयोगका पूर्व सदस्य डा.रामकुमार फुँयालले कार्यपत्र प्रस्तुत गरेका थिए । प्रस्तुती लगत्तै उपस्थित महानुभावहरुलाई चार मिनेटको समय उपलब्ध गराई सुझाव संकलन गरिएको थियो । विज्ञहरुले दिएका सुझावलाई टिपोट मार्फत संकलन गरी केही दिन भित्र अर्थमन्त्रीलाई बुझाउने आयोजक संस्था राष्ट्रिय आर्थिक सरोकार समाज, नेपालका अध्यक्ष गंगा बहादुर थापा र आर्थिक विकास तथा प्रशासन अनुसन्धान केन्द्र (सेडा) का कार्यकारी निर्देशक प्रो.डा अर्जुन कुमार बरालले बताएका छन् ।
Discussion about this post