काठमाण्डौ । सहरी विकास मन्त्रालयले गत आर्थिक वर्ष २०८१/८२ मा २७८ वटा झोलुङ्गे पुलको निर्माण सम्पन्न गरेको जनाएको छ । यस अवधिमा रणनीतिक रूपमा महत्वपूर्ण रहेको मुलुककै सबैभन्दा लामो त्रिवेणी सुस्ता बहुत्तरी झोलुङ्गे पुल सञ्चालन भएको छ । जसको लम्बाइ १ हजार ५ सय ७१ मिटर रहेको छ ।
यसैगरी सोही अवधिमा २२ वटा स्थानीय सडक पुल, २७७.८ किलोमिटर ग्रामीण कालोपत्रे सडक, ४९० किलोमिटर सहरी कालोपत्रे सडक र २४० किलोमिटर नाला निर्माण सम्पन्न गरेको सहरी विकास मन्त्रालयले जनाएको छ ।
सहरी विकासले आइतबार एक विज्ञप्ति जारी गर्दै सो विषयको बारेमा जानकारी गराएको हो । सो अवधिमा ८० वटा विद्यालय भवन निर्माण, ६४ वटा स्वास्थ्य संस्था निर्माण, ५५ वटा स्थानीय तहको भवन निर्माण, ४८ वटा सार्वजनिक भवन निर्माण, सात वटा सभा हल निर्माण, २१ वटा पार्क निर्माण र १८ वटा कार्यालय भवन निर्माण सम्पन्न भएको विज्ञप्तिमा जनाइएको छ । बागमती सुधार कार्यक्रम अन्तर्गत २.९ किलोमिटर नदी तटबन्ध निर्माण सम्पन्न भएको हो । (रासस)
Discussion about this post