काठमाण्डौ । चालु आर्थिक वर्षमा वैदेशिक रोजगारीमा जाने नेपालीको संख्या उच्च दरमा बढेको छ । यो आर्थिक वर्षको चार महिनामा रोजगारी खोज्दै विदेश जाने नेपालीको संख्या २ लाख ७३ हजार ८०५ जना पुगेको छ ।
वैदेशिक रोजगार विभागका अनुसार कात्तिकसम्ममा २ लाख ७३ हजार ८०५ जनाले श्रमस्वीकृति लिएर विदेश जाने अनुमति पाएका छन् । गत आर्थिका वर्षका चार महिनामा २ लाख २७ हजार ६ सय १५ जनाले श्रमस्वीकृति पाएका थिए । चालु आर्थिक वर्षमा यो संख्या ४६ हजार १९० ले बढेको छ । जुन २०.२९ प्रतिशतले धेरै हो ।
भदौमा भएको जेनजी आन्दोलनपछि यूएईलगायत केही मुलुकले नेपाली कामदारको भिषा प्रक्रिया रोकेका थिए । यस्तो अवस्थामा पनि कामका लागि विदेश जानेहरु बढेका छन् । साउनदेखि नै बढेको विदेश जानेको संख्या हालसम्म पनि कायम छ ।
यसैगरी, चालु आर्थिक वर्षमा श्रमस्वीकृति लिने महिलाको संख्या गत वर्षको तुलनामा १३ प्रतिशतले बढेको छ । विभागका अनुसार गत वर्ष साउन–कात्तिकमा २९ हजार ९५६ महिला रोजगारीका लागि विदेश गएका थिए । चालु आर्थिक वर्षमा यो संख्या ३३ हजार ८१५ पुगेको छ ।
विभागका अनुसार पछिल्लो समय श्रम गन्तव्यबाट माग बढी आएका कारण वैदेशिक रोजगारी जान श्रमस्वीकृति लिनेको संख्या बढेको हो । पछिल्लो समय स्वदेशमा रोजगारीको सम्भावना कम हुँदै गएपछि वैदेशिक रोजगारीमा जाने प्रवृत्ति बढ्दै गइरहेको छ ।
विभागले नेपालको आन्तरिक रोजगारीको विकल्पका रुपमा रहेको वैदेशिक रोजगारी कोभिड संक्रमणपछि ३ वर्ष लगातार उकालो लागेको जनाएको छ । विभागले श्रम गन्तव्यमा भएको श्रमिकमैत्री कानुनको परिमार्जन, श्रमस्वीकृति सेवालाई पूर्ण अनलाइन र गन्तव्यमा चरम श्रमिक अभावका कारण माग बढ्न गई श्रमस्वीकृति लिनेको संख्या बढेको जानकारी दिएको छ । श्रमिक स्रोत देश नेपालको आन्तरिक रोजगारीमा आएको कमी र गन्तव्यमा मुलुकमा श्रमिक अभाव भएका कारण पनि श्रमस्वीकृति लिनेको संख्या बढेको विज्ञको भनाइ छ ।
गत आवको तथ्यांकसहित विगत ३ वर्षमा २५ लाख युवाले रोजगारी खोज्दै नेपाल छोडेका छन् । तीन वर्षको तथ्यांकलाई औषत गर्दा वार्षिक ७ लाख ६६ हजार नेपाली जनशक्ति रोजगारी खोज्दै विदेश गएका देखिन्छ । यो संख्या पुनः श्रमस्वीकृति लिएर गएका समेतको हो । विदेश जान श्रमस्वीकृति लिएका मध्ये ६४ प्रतिशत नयाँ कामदार हुने गरेका छन् भने ३६ प्रतिशत बिदामा आएर पुनः श्रमस्वीकृति लिनेको संख्या रहेको छ ।
गत आर्थिक वर्षमा रोजगारी खोज्दै ८ लाख ३३ हजारभन्दा बढी युवा विदेश गएका थिए । वैदेशिक रोजगारको ३० वर्षको इतिहासमा गत आवमा ८ लाख ३९ हजार युवाले विदेश जान श्रमस्वीकृति लिएका थिए । सरकारले श्रमस्वीकृतिको तथ्यांक राख्न थालेको ३० वर्षमध्ये गत आवमा सबैभन्दा बढी श्रमिकले वैदेशिक रोजगारीका लागि अनुमति लिएका छन् । वैदेशिक रोजगार विभागले २०५० सालदेखि श्रमस्वीकृति लिएर विदेश जाने श्रमिकको तथ्यांक राख्न शुरु गरेको थियो ।
Discussion about this post