काठमाण्डौ । गत आर्थिक वर्षमा वार्षिक औसत मुद्रास्फीति ४.०६ प्रतिशत कायम भएको छ । नेपाल राष्ट्र बैंकले भाद्र पहिलो साता सार्वजनिक गरेको गत आर्थिक वर्षको आर्थिक तथा वित्तीय विवरणअनुसार यो वर्ष मुद्रास्फीति केही घटेको हो । अघिल्लो वर्ष वार्षिक औसत मुद्रास्फीति ५.४४ प्रतिशत थियो ।
बैंकले बताए अनुसार गत आर्थिक वर्षमा आर्थिक वृद्धिदर ४.६१ प्रतिशत रहेको अनुमान छ । त्यस अघिको वर्षमा आर्थिक वृद्धिदर ३.६७ प्रतिशत थियो । यस्तै शोधनान्तर स्थिति ५९४ अर्ब ५४ करोडले बचतमा छ । अघिल्लो वर्ष शोधनान्तर स्थिति ५०२ अर्ब ४९ करोडले बचतमा थियो । यस्तै आयात १३.३ प्रतिशतले र निर्यात ८१.८ प्रतिशतले बढेको छ । अघिल्लो वर्ष आयात १.२ प्रतिशतले र निर्यात ३.० प्रतिशतले घटेको थियो ।
गएको आर्थिक वर्षमा विप्रेषण आप्रवाह १९.२ प्रतिशतले बढेर १७२३ अर्ब २७ करोड पुगेको छ । अघिल्लो वर्ष विप्रेषण आप्रवाह १६.५ प्रतिशतले बढेको थियो । २०८२ असार महिनाको विप्रेषण आप्रवाह १८९ अर्ब ११ करोड रहेको छ । अघिल्लो वर्षको सोही महिनामा यस्तो आप्रवाह ११७ अर्ब ७८ करोड रहेको थियो ।
यसैगरी कुल विदेशी विनिमय सञ्चिति अमेरिकी डलरमा १९ अर्ब ५० करोड पुगेको छ । उक्त सञ्चिति १५.४ महिनाको वस्तु तथा सेवा आयात धान्न पर्याप्त छ । २०८१ असार मसान्तमा २०४१ अर्ब १० करोड बराबर रहेको कुल विदेशी विनिमय सञ्चितिमा ३१.२ प्रतिशतले बढेर २०८२ असार मसान्तमा २६७७ अर्ब ६८ करोड पुगेको छ ।
विस्तृत मुद्राप्रदाय १२.५ प्रतिशतले बढेको बैंकले जनाएको छ । अघिल्लो वर्ष यस्तो मुद्राप्रदाय १२.९ प्रतिशतले बढेको थियो । बैंक तथा वित्तीय संस्थाको निक्षेप संकलन १२.६ प्रतिशतले वृद्धि भएर ७२ खर्ब ६४ अर्ब पुगेको छ भने निजी क्षेत्रमा प्रवाहित कर्जा ८.४ प्रतिशतले वृद्धि भएर ५४ खर्ब ९८ अर्ब पुगेको छ ।
Discussion about this post