काठमाण्डौ । गत भदौमा भएको जेनजी आन्दोलनका कारण भएको क्षतिबापत भुक्तानीका लागि बीमा कम्पनीहरूले पुस २ गतेसम्म नेपाल पुनर्बीमा कम्पनीमा १६ अर्ब ६२ करोड रुपैयाँ दाबी गरेका छन् । आतंकवाद तथा हूलदंगा बीमाअन्तर्गत पुनर्बीमा गरेको पुनर्बीमा कम्पनीमा १४ ओटा निर्जीवन बीमा कम्पनीहरूले २ हजार ८ सय ६२ ओटा पुनर्बीमा दाबी पेश गरेको नेपाल बीमा प्राधिकरणले जनाएको छ ।
जेनजी आन्दोलनमा भएको भौतिक तथा अन्य क्षतिको निर्जीवन बीमा कम्पनीहरूमा ३ हजार ३ सय ३ ओटा आवेदनमार्फत २३ अर्ब ४५ करोड दाबी परेको छ । त्यसमध्ये कम्पनीहरूले ७० प्रतिशत दाबी पुनर्बीमा कम्पनीमा गरेका हुन् ।
आन्दोलन तथा हूलदंगाबाट हुने क्षतिको पुनर्बीमा गर्न सरकार र बीमा कम्पनीहरूको समेत लगानीमा बीमा पुल स्थापना गरिएको थियो । सोही बीमा पुल नेपाल पुनर्बीमा कम्पनीमा परिणत भएको हो । नेपाली बीमा कम्पनीहरूले गरेको सम्पत्ति बीमाअन्तर्गत आतंकवाद तथा हूलदंगा बीमाको जोखिममा पुनर्बीमा नेपाल रिमा मात्र गर्नुपर्ने कानूनी व्यवस्थाका कारण जेनजी आन्दोलनको क्षतिमा कम्पनीमा ठूलो दाबी परेको छ । पुनर्बीमा कम्पनीले महाविपत्तिको रेट्रोसेशन गराएको र त्यसबापत विदेशी कम्पनीले पनि दाबी बेहोर्ने भएकाले दाबी भुक्तानीमा समस्या नहुने दाबी गर्दै आएको छ ।
बीमा प्राधिकरणका अनुसार हालसम्ममा बीमा कम्पनीहरूले अग्रिम भुक्तानीसमेत गरी करीब ५ अर्ब १८ करोड रुपैयाँ दाबी रकम बीमितहरूलाई भुक्तानी गरिसकेका छन् । यो दाबीको २२ प्रतिशत हो ।
प्राधिकरणका अनुसार १४ निर्जीवन बीमा र ४ ओटा लघु निर्जीवन बीमा कम्पनीहरूले सम्पत्ति बीमातर्फ ७१० ओटा आवेदनबाट १९ अर्ब २ करोड रुयैयाँ दाबी गरेकोमा ३ अर्ब ८२ करोड र मोटर बीमातर्फ २ हजार ३११ ओटा आवेदनबाट ३ अर्ब ४७ करोड रुपैयाँ दाबी गरेकोमा १ अर्ब २२ करोड भुक्तानी गरेका छन् ।
यसैगरी इन्जिनीयरिङ तथा ठेक्का जोखिम बीमातर्फ २२५ ओटा बीमा दाबीको ५५ करोड ४७ लाखमध्ये ७ करोड ५० लाख, परिवहन बीमातर्फ १२ ओटा बीमा दाबीको १ करोड ६९ लाखमध्ये १ करोड ५५ लाख र अन्य बीमातर्फ ४५ ओटा दाबीको ३८ करोड ४० लाखमध्ये ५ करोड ५० लाख रुपैयाँ अग्रिम भुक्तानी गरेको प्राधिकरणले जानकारी दिएको छ ।
बीमा दाबी भुक्तानीका लागि नेपाल पुनर्बीमा कम्पनीले निर्जीवन बीमा कम्पनीहरूलाई ३ अर्ब २ करोड रुपैयाँ अग्रिम भुक्तानी गरेको प्राधिकरणका कार्यकारी निर्देशक सुशीलदेव सुवेदीले जानकारी दिए ।
Discussion about this post