काठमाडौं, चैत १३ः नव नियुक्त अर्थमन्त्री डा. स्वर्णिम वाग्लेले अर्थतन्त्रको वर्तमान स्थिति सम्बन्धी विशेष पत्र तयार गरेर सार्वजनिक गर्ने पहिलो निर्णय गरेका छन् ।
आज नवगठित सरकारमा अर्थमन्त्री नियुक्त भएका डा. वाग्लेले पदभार गर्दै तीन वटा निर्णय गरेका छन । त्यसमा चैत १२ गतेसम्मको अर्थतन्त्रको वर्तमान स्थितिबारे पत्र सार्वजनिक गर्दै निर्वाचन अघिका वाचा कार्यान्वयन गर्न कार्ययोजना बनाउने उनको निर्णय छ ।
निर्णयमा ‘चैत्र १२, २०८२ सम्मको आर्थिक स्थिति पत्र तत्काल तयार गर्दै निर्वाचन वाचा कार्यान्वयनको १०० दिने, अर्ध वार्षिक र वार्षिक कार्ययोजना बनाउने,’ भनिएको छ ।
यसैगरी, उच्च स्तरीय आर्थिक सुधार सुझाव आयोग, २०८१ को प्रतिवेदनले सिफारिस गरेका १५ वटा कानुन खारेज गर्ने उनको निर्णय छ । ‘उच्चस्तरीय आर्थिक सुधार सुझाव आयोग २०८१ को प्रतिवेदनमा सिफारिस भएको राजश्व अनुसन्धान विभाग लगायत १५ वटा ऐन खारेज गर्ने,’ निर्णयमा भनिएको छ ।
यस्तै, निजी उद्यम–व्यवसाय सुरक्षा एवं प्रवद्र्धन र ठूला विकास आयोजना सहजीकरण लगायत नयाँ विधेयक वा तिनको संशोधनको प्राथमिकीकरण तय गर्दै वृहत आर्थिक–कानूनी सुधारको मार्गचित्र बनाउने कुरा निर्णयमा उल्लेख छ ।
Discussion about this post