हुलाकी लोकमार्ग एक दशकदेखि निर्माण अलपत्र

सप्तरी, चैत १० गते । हुलाकी लोकमार्गमा पुल तथा सडक निर्माणको काम एक दशकदेखि अलपत्र अवस्थामा छ । हुलाकी लोकमार्ग अन्तर्गत सप्तरीको राजविराज–कञ्चनपुर जोड्ने जिल्लाको अग्निसायरकृष्ण सवरण गाउँपालिका–४, बनौलीस्थित कालियाखोलामा पुल र सडकमा कालोपत्रेको काम अलपत्र अवस्थामा छ ।
लामा बागमती निर्माण सेवाले २०७१ सालमा निर्माण सुरु गरेको थियो । पुल नबन्दा वर्षायाममा खोला तरेर दैनिक सयौँ सवारीसाधन र स्थानीयले आवातजावत गर्नुपर्ने बाध्यता रहेको स्थानीय रामदेव यादवले गुनासो गर्नुभयो । जिल्लाको सदरमुकाम राजविराजसमेत जोड्ने पुल भएकाले हजारौँ मानिसले जोखिमपूर्ण यात्रा गर्न बाध्य रहेको उहाँले बताउनुभयो ।
तिरहुत गाउँपालिका–३ का बुधिलाल अरगारिया यादवले समयमा पुल निर्माण नहुँदा वर्षाको समयमा खोलामा अत्यधिक बाढी आउने र आवतजावतमा अवरोध सिर्जना हुने गरेको बताउनुभयो । उहाँले सामान्य वर्षा भए पनि खोलाबाट चारपाङ्ग्रे र दुईपाङ्ग्रे गाडी आउनेजाने क्रम पूर्ण रूपमा बन्द हुने गरेको बताउनुभयो ।
राजविराजबाट जिल्लाको पूर्वमा महेन्द्र लोकमार्ग जोड्ने तिरहुत गाउँपालिका, कञ्चनरूप नगरपालिका, सप्तकोशी नगरपालिका र उदयपुर जिल्लाको पुर्वीभेगका लामो तथा छोटो दुरीका सवारीसाधन सञ्चालनमा अवरोध हुने गरेको उहाँले बताउनुभयो ।
यस आसपास जोडिएको करिब दुई किलोमिटर सडकसमेत कालोपत्रे हुन सकेको छैन । बज्रगुरु निर्माण सेवा जेभीको ठेक्कामा रहेको यो सडक कालोपत्रे नहुँदा थप समस्या भइरहेको सोही ठाउँका देवनारायण यादवले गुनासो गर्नुभयो । यस्तै तिरहुत गाउँपालिका–५, बुधेवामा पुल निर्माण भए पनि त्यससँग जोडिएको एक किलोमिटर सडक कालोपत्रे गर्न ढिलाइ भएको छ ।
हुलाकी सडक योजनाको निर्माण कम्पनी बज्र गुरूका प्रतिनिधि कुशकुमार उपाध्यायका अनुसार राजविराज नगर क्षेत्रभित्र सीमा विवादका कारण काम गर्न ढिलो भएको बताउनुभयो  । विवादरहित क्षेत्रमा सडक निर्माणको काम ७५ प्रतिशत पूरा भइसकेको जानकारी दिँदै उहाँले राजविराजस्थित कोशी पम्प नहरदेखि हनुमान मन्दिरसम्मको सडक निर्माण कार्य विवादका कारण करिब दुई किलोमिटर मात्र सडक निर्माण हुन बाँकी रहेको जानकारी दिनुभयो । उहाँले अहिले नाला निर्माणको काम सम्पन्न भएपछि सडक कालोपत्रेको काम तयारी अवस्थामा रहेको बताउनुभयो ।
उहाँले २०७५ सालदेखि प्रारम्भ गरिएको सडक निर्माण स्थानीयको अवरोध र पुल निर्माण समयमा नभएका कारण सडक निर्माण पाँच वर्ष ढिलो भएको जानकारी दिनुभयो । उहाँका अनुसार सडक निर्माण २०८२ साल वैशाख महिनासम्म सम्पन्न गर्ने बताउनुभयो ।
उपाध्यायकाले राजविराज–३ नं वडाले काम गर्न अवरोध गर्दा निर्माण अवरुद्ध हुन पुगेको बताउनुभयो । उहाँले वडाले काम गर्न अवरोध नगरे वैशाख मसान्तभित्र निर्माण कार्य सम्पन्न गर्ने बताउनुभयो । राजविराज नगरपालिकाका प्रवक्ता तथा ८ नम्बर वडाध्यक्ष जयनारायण मण्डलका अनुसार ३ नं वडाले काम गर्न गरेको अवरोधलाई सहमतिबाट समाधान गर्ने बताउनुभयो । (रासस)