ओखर खेतीमा बढ्दो आकर्षण

बागलुङ । बागलुङका किसानले बाँझो जमिनमा व्यवसायिक ओखर खेती गर्न सुरु गरेका छन् । खाद्यन्नबाली लगाउँदा उत्पादन कम भएको भन्दै बाँझो जमिनमा किसानले अहिले नगदेबाली लगाउन सुरु गरेका हुन् ।

पाँच वर्षदेखि झाँडी र उत्तिसले भरिएको जमिनलाई उपयोग गरि बागलुङ नगरपालिका, काठेखोला, तमानखोला, निसीखोला, बरेङ गाउँपालिका र जैमिनी नगरपालिकाका उपल्लो भेगहरुमा किसानले ओखर खेती गर्न थालेका छन् । ओखर खेतीतर्फ प्रोत्साहन र उत्पादनमा वृद्धि गर्न सरकारी निकायबाट सहयोग हुन थालेपछि किसानहरुले व्यवसायी खेती गर्न थालेका हुन् ।

समुह, सहकारी र फर्म मार्फत किसानले ओखरको खेती गरेको स्थानीय किसान प्रेमबहादुर खड्काले बताउनुभयो । “खेती गर्न छाडेपछि जमिनमा झाँडी र उत्तिस उम्रिन थालेको थियो, खड्काले भन्नुभयो, अहिले जग्गाको उपयोग गरि व्यवसायी ओखर खेती गर्न सुरु गरेका छौं ।” बागलुङ नगरपालिका ९ को दुर्लेनी जङ्गलले ढाकिएको जमिनमा अहिले ओखरको खेती गर्न लागिएको अर्का किसान देव बहादुर खड्काले बताउनुभयो ।

किसानले ओखर खेतीको लागि १० लाख रुपियाँसम्म लगानी गरेका छन् । अहिले ओखरका २ हजार बढी बिरुवा हुर्कंदै गरेको र अबको केही वर्षपछि फल दिन सुरु हुने उहाँले बताउनुभयो । बागलुङमा १ सय ५० किसान व्यवसायीक ओखरको खेती गरेका छन् । जिल्लामा ४ सय ४० रोपनी क्षेत्रफलमा ओखर खेतीको विस्तार गरिएको प्रधानमन्त्री कृषि आधुनिकरण परियोजना बागलुङ नारायण पौडेलले बताउनुभयो ।

जिल्लाको उपल्लो भेगहरुमा ६ हजार ५ सय वटा ओखरका बिरुवा लगाइएको छ । चक्ताबन्दी रुपमा व्यवसायी खेती गर्ने किसानहरुलाई प्रधानमन्त्री कृषि आधुनिकरण परियोजनाले रु १० लाख रुपियाँसम्म अनुदान दिँदै आएको छ । कृषि ज्ञान केन्द्र र स्थानीय तहले व्यक्तिगत तथा सामुहिक रुपमा ओखर खेती गर्दै आएका किसानलाई बिरुवामा दुई हजार रुपियाँसम्म अनुदानका र प्राविधिक सहयोग समेत हुँदै आएको छ । (रासस)