धान चामलको आयातमा उल्लेख्य बृद्धि

काठमाण्डौ । आर्थिक वर्ष २०८१÷८२ को आठ महिनामा २९ अर्बको धान चामल आयात भएको छ । अघिल्लो दुई आर्थिक वर्ष लगातार आयात घट्दै गएपछि चामल उद्योगीहरूले अवैधानिक आयात बढेको बताएका थिए ।

चालु वर्षमा धानको आयात परिमाणात्मक रूपमा ९१ प्रतिशत र मूल्यका हिसाबले ९३ प्रतिशतले बढेको छ । भन्सार विभागको तथ्यांक अनुसार गत वर्ष यसै समयमा ८ अर्ब ६४ करोड रूपैयाँ बराबरको २२ करोड ८३ लाख केजी धान आयात भएको थियो ।

यस वर्ष १६ अर्ब ७१ करोड रूपैयाँमा ४३ करोड ६३ लाख केजी धान आयात भएको छ भने चामलको आयात पनि यसैगरी बढेको छ । गत वर्ष यो समयमा ६ अर्ब ७९ करोड रूपैयाँ बराबरको ६ करोड २१ लाख केजी चामल आयात भएको थियो ।

यो वर्ष १२ अर्ब ३२ करोड रूपैयाँमा १५ करोड ४० लाख केजी आयात भएको छ । चालु वर्षको साउनदेखि फागुन महिनाको अवधिमा मात्रै करिब २९ अर्ब रूपैयाँको धान र चामल आयात भएको छ । गत वर्ष यसै समयमा १५ अर्ब रूपैयाँको धान र चामल आयात भएको थियो ।