काठमाण्डौ । वाणिज्य बैंकहरूको कुल सम्पत्ति क्रमशः बढ्दै गएको छ । पछिल्लो एक वर्षको अवधिमा बैंकहरूको सम्पत्ति ८ खर्ब ७९ अर्ब रुपैयाँले बढेको छ । यो तथ्यांक वाणिज्य बैंकहरूले सार्वजनिक गरेका आर्थिक वर्ष २०८१/८२ को चौथो त्रैमासिक वित्तीय विवरणमा उल्लेख गरिएको हो ।
बैकहरुले सार्वजनिक गरेको विवरण अनुसार २० वाणिज्य बैंकको कुल सम्पत्ति ७७ खर्ब ७६ अर्ब ८५ करोड ६४ लाख ५३ हजार रुपैयाँ पुगेको हो । बैंकहरुको कुल सम्पत्ति अघिल्लो आर्थिक वर्ष २०८०/०८१ को तुलनामा १२.७४ प्रतिशतले बढी हो । अघिल्लो आर्थिक वर्षमा बैंकहरुको सम्पत्ति ६८ खर्ब ९७ अर्ब ८३ करोड ८० लाख रुपैयाँ रहेको थियो ।
कुन वाणिज्य बैंकको सम्पति कति ?
गत वर्ष सबैभन्दा धेरै सम्पत्ति हुनेमा ग्लोबल आइएमई बैंक रहेको छ । आर्थिक वर्ष २०८१/८२ को चौथो त्रैमाससम्ममा बैंकको सम्पत्ति ६ खर्ब ८९ अर्ब रुपैयाँ नाघेको छ, जुन अघिल्लो वर्षको तुलनामा १४.१० प्रतिशतले बढी हो । यो अवधिमा ग्लोबल आइएमईको सम्पत्ति करिब ८५ अर्ब रुपैयाँले बढेको हो । सम्पत्तिको आधारमा नबिल बैंक दोस्रो स्थानमा रहेको छ, जसको कुल सम्पत्ति ६ खर्ब ३८ अर्ब रुपैयाँ पुगेको छ । एक वर्षको अवधिमा बैंकको सम्पत्तिमा ८१ अर्बले बढेको हो ।
त्यस्तै, राष्ट्रिय वाणिज्य बैंकको कुल सम्पत्ति ५ खर्ब ८५ अर्ब रुपैयाँ पुगेको छ । नेपाल इन्भेष्टमेन्ट मेगा बैंकको सम्पत्ति ५ खर्ब ६५ अर्ब रुपैयाँ पुगेको छ । लक्ष्मी सनराइज बैंक र कुमारी बैंक दुवैको सम्पत्ति समान रूपमा ४ खर्ब ४२ अर्ब रुपैयाँ रहेको छ ।
यसैगरी, प्रभु बैंकको सम्पत्ति ४ खर्ब १० अर्ब रुपैयाँ पुगेको छ । नेपाल बैंकको ३ खर्ब ९९ अर्ब,एनआईसी एशिया बैंकसँग ३ खर्ब ७८ अर्ब र हिमालयन बैंकसँग ३ खर्ब ७२ अर्ब रुपैयाँ बराबरको सम्पत्ति रहेको छ । एभरेष्ट बैंक, कृषि विकास बैंक र एनएमबि बैंकको सम्पत्ति क्रमशः ३ खर्ब ६५ अर्ब, ३ खर्ब ६२ अर्ब र ३ खर्ब ५२ अर्ब रुपैयाँ पुगेको छ ।
साथै, सिद्धार्थ बैंकको कुल सम्पत्ति ३ खर्ब ३८ अर्ब रुपैयाँ रहेको छ । त्यसैगरी, प्राइम बैंकको ३ खर्ब १७ अर्ब, सानिमा बैंकको २ खर्ब ६३ अर्ब, सिटिजन्स बैंकको २ खर्ब ४५ अर्ब, नेपाल एसबिआई बैंकको २ खर्ब ३२ अर्ब, माछापुच्छ्रे बैंकको २ खर्ब १७ अर्ब र स्टान्डर्ड चार्टर्ड बैंकको कुल सम्पत्ति १ खर्ब ५५ अर्ब रुपैयाँ पुगेको छ ।
Discussion about this post