काठमाण्डौ । चालु आर्थिक वर्षको कात्तिकसम्ममा कुल विदेशी विनिमय सञ्चिति ३० खर्ब ५५ अर्ब ५२ करोड पुगेको छ । राष्ट्र बैंकले मंसिर २९ गते सार्वजनिक गरेको कात्तिकसम्मको देशको आर्थिक तथा वित्तीय स्थितिको तथ्यांक अनुसार अमेरिकी डलरमा विदेशी सञ्चिति २१ अर्ब ५२ करोड पुगेको छ । उक्त सञ्चितिले १७.४ महिनाको वस्तु तथा सेवा आयात धान्न पर्याप्त छ ।
विप्रेषण आप्रवाह नेपाली रुपैयाँमा ३१.४ प्रतिशतले र अमेरिकी डलरमा २५.३ प्रतिशतले बढेको छ । चालु आर्थिक वर्षको कात्तिक महिनाको विप्रेषण आप्रवाह १३३ अर्ब ८२ करोड छ । यस्तै यो अवधिमा निर्यात ७७.५ प्रतिशतले र आयात १८.७ प्रतिशतले बढेको छ । विस्तृत मुद्राप्रदाय ३.० प्रतिशतले बढेको छ । वार्षिक विन्दुगत आधारमा यस्तो मुद्राप्रदाय १२.५ प्रतिशतले बढेको छ ।
यस्तै बैंक तथा वित्तीय संस्थाको निक्षेप परिचालन ३.१ प्रतिशत र निजी क्षेत्रमा प्रवाहित कर्जा १.२ प्रतिशतले बढेको छ । वार्षिक विन्दुगत आधारमा निक्षेपको वृद्धिदर १३.४ प्रतिशत र निजी क्षेत्रमा प्रवाहित कर्जाको वृद्धिदर ६.९ प्रतिशत रहेको छ । बैंक तथा वित्तीय संस्थाहरूबीचको भारित औसत अन्तरबैंक दर २.७५ प्रतिशत र ९१– दिन अवधि भएको ट्रेजरी बिलको भारित औसत ब्याजदर २.३७ प्रतिशत छ ।
वाणिज्य बैंकहरूको निक्षेपको भारित औसत ब्याजदर ३.७४ प्रतिशत र कर्जाको भारित औसत ब्याजदर ७.३८ प्रतिशत रहेको छ । वार्षिक विन्दुगत आधारमा उपभोक्ता मूल्य सूचकांकमा आधारित मुद्रास्फीति १.११ प्रतिशत रहेको छ । यस्तै कात्तिकसम्ममा चालु खाता २७९ अर्ब ६५ करोड र शोधनान्तर स्थिति ३१८ अर्ब ४० करोड बचतमा छन् ।
Discussion about this post