कुन बैंकको गैरबैंकिङ सम्पत्ति कति ?

काठमाण्डौ । अर्थतन्त्रको सुस्तता र निष्क्रिय कर्जा असुलीमा समस्या बढ्दै जाँदा वाणिज्य बैंकहरूको गैरबैंकिङ सम्पत्ति बढ्दै गएको छ ।

पुस मसान्तसम्ममा वाणिज्य बैंकहरूको कुल गैरबैंकिङ सम्पत्ति ४६ अर्ब ५६ करोड १७ लाख रुपैयाँ पुगेको छ । यो गत आर्थिक वर्षको सोही अवधिको तुलनामा १९.८० प्रतिशत अर्थात् ७ अर्ब ६९ करोड ३० लाख रुपैयाँले बढी हो । गत आवको पुससम्ममा यस्तो सम्पत्ति ३८ अर्ब ८६ करोड ८६ लाख रुपैयाँ थियो ।

राष्ट्रिय वाणिज्य बैंकको गैरबैंकिङ सम्पत्ति २.९८ प्रतिशतले घटेर २८ करोड ८७ लाख रुपैयाँ कायम भएको छ भने एभरेष्ट बैंकको ०.६७ प्रतिशतले घटेर ५१ करोड ६९ लाख रुपैयाँमा झरेको छ । माछापुच्छ्रे बैंकको गैरबैंकिङ सम्पत्तिमा ४३.८६ प्रतिशत घटेर ६० करोड रुपैयाँमा झर्दा कुमारी बैंकको यस्तो रकम ६.६३ प्रतिशतले घटेर २ अर्ब ४९ करोड ४ लाख रुपैयाँ पुगेको छ । यी चार बैंकबाहेक अन्य सबैको गैरबैंकिङ सम्पत्तिमा वृद्धि देखिएको छ ।

त्यसैगरी नेपाल बैंकको यस्तो सम्पत्ति २९.४५ प्रतिशतले बढेर २६ करोड ४२ लाख पुगेको छ । नबिल बैंकमा सामान्य वृद्धि भएर ३ अर्ब ४१ करोड ४१ लाख रुपैयाँ पुगेको छ । नेपाल इन्भेष्टमेण्ट मेगा बैंकको २५.७८ प्रतिशतले बढेर ३ अर्ब ८७ करोड ९४ लाख पुगेको छ । हिमालयन बैंकको गैरबैंकिङ सम्पत्ति ४४.२१ प्रतिशतले बढेर कुल रकम ६ अर्ब १३ करोड १ लाख रुपैयाँ पुगेको छ । नेपाल एसबिआई बैंकको गैरबैंकिङ सम्पत्ति सबैभन्दा धेरै १८८.२७ प्रतिशतले बढ्दै १ अर्ब २ करोड रुपैयाँ पुगेको छ ।

त्यसैगरी एनआईसी एशिया बैंकको ५.९७ प्रतिशतले बढेर ४ अर्ब ३१ करोड ७४ लाख, लक्ष्मी सनराइज बैंकको ४२.२१ प्रतिशतले बढेर २ अर्ब २४ करोड ९० लाख र सिद्धार्थ बैंकको ९.६८ प्रतिशतले बढेर ७७ करोड २० लाख रुपैयाँ पुगेको छ । कृषि विकास बैंकको ३१.६१ प्रतिशतले बढेर १ अर्ब ३३ करोड ६८ लाख पुगेको छ भने ग्लोबल आइएमई बैंकको ७.७० प्रतिशतले बढेर ५ अर्ब ९९ करोड ८७ लाख रुपैयाँ पुगेको छ ।

सिटिजन्स बैंकको ३२.६९ प्रतिशतले बढेर १ अर्ब २७ करोड ५० लाख, प्राइम कमर्सियल बैंकको ११८.०८ प्रतिशतले बढेर ४ अर्ब ४१ करोड ५४ लाख, एनएमबि बैंकको ६२.९० प्रतिशतले बढेर १ अर्ब ८३ करोड २६ लाख, प्रभु बैंकको ४४.१८ प्रतिशतले बढेर १ अर्ब ७५ करोड ५० लाख र सानिमा बैंकको ३९.२९ प्रतिशतले बढेर १ अर्ब १ करोड ८४ लाख रुपैयाँ पुगेको छ ।

चालु आवको पहिलो ६ महिनासम्ममा वाणिज्य बैंकको खराब कर्जा औसतमा ५.०८ प्रतिशत पुगेको छ । गत आवको सोही अवधिमा बैकको औसत खराब कर्जा ४.४९ प्रतिशत थियो ।